مقال
د/ عصام عبدالصمد
🛑غش السمك في اسكندرية
1- متشتريش فيليه .. الفيليه في اسكندرية اما من سمك الباسا بتاع مصارف اسيا .. او قراض .. ودي سمكة سامة ممكن تموتك ..
2- هتلاقي جمبري برتقالي بيتباع في الشارع ، متقربش منه ، دا مجمد ومفكوك ومهري ومصبوغ .
3- هتلاقي جمبري اسود ، دا مزارع ، وجمبري فيه كتلة خضراء كدا .. دا مزارع برضو وبايظ .
4- أفضل جمبري الأزاز .. بيبقى مخطط كدا .. البلدي السويسي .. بس السعر عالي..
5- هتلاقي بياعين بيبيعوا سمك كبير ويقولوا قاروص وهيعرضوه ب 100 وهتعمل فيها ناصح وتنزله لخمسين وتفكر انك ضحكت عليه .. دا سمك سيلفر .. الكيلو منه بخمسة جنيه .. القاروص الكيلو منه ب 250 .. القاروص له زعنفتين على ضهره والسيلفر زعنفة واحدة .
6- البوري .. معظمه مزارع .. سمك المزارع مش وحش .. بس متاخدوش بسعر البحر .. وغالبا هيتباع ليك طوبار مش بوري .. الطوبار سمكة من فصيلة البوري جودتها وسعرها اقل .
7- تعبان المارينا .. متشتريهوش .. لو ليك في الحناش خليك في الحنش البلدي الاخضر .. المارينا مبيتاكلش .. كله شوك وطعمه سئ..
8- متشتريش ماكريل .. غالبا هيبقى سمكة شاخورة .. هي مش وحشة لكن مش بجودة الماكريل .
9- البربوني في الغالب بيكون عماني مجمد .. وييجي يتفك فيتهري ..السمكة البلدي الطازة بتبقى ماسكة نفسها عادي .
10- لو حبيت تشتري تونة اتأكد الاول انها مش ( كبريت ) سمكة الكبريت من فصيلة التونة لكن الكيلو بتاعها ب 25 جنيه .. مش ب 100 .
11- متعملش ناصح وتروح مزاد سمك .. لو طالبة معاك فروح في المزاد والطاولة اللى تعجبك اتقل لحد ما ترسى على حد واشتريها منه بفرق بسيط اضمنلك.
12- المطاعم الغالية زي عروس البحر والكتعة و قدورة .. هيقدمولك اكل جودته عالية جدا ومبيغشوش .. بس سعرهم في السما .. لو ميزايتك منخفضة ونفسك في سمك روح على اي محل سمك في الاسواق الشعبية هتدعيلي .
13- متشتريش حاجة انت مش عارفها .. ومتشتريش شروة لانك مش هتعرف تقدر سعرها.
14- مهما حاولت تعمل فيها اسكندراني وانت مفكر انك كدا هتاكل البياع بالكلام .. مش هتعرف .. بنقفشكم والله .
15- لو خلاص هتموت وتشتري سمك .. روح اي سوق ونشن على نوع السمك اللى انت عايزه .. وتستنى لما تدخل على البياع ست اسكندرانية اصيلة تشتري منه بعد ما تقطع نفسه وتروح تخلص بنفس السعر ..
الإخوة والاخوات
ده مش كلامي ، ده كلام السماك الإسكندراني ، أنا والمصحف الشريف لا أفهم في السمك ، ولا في الكابوريا ، ولا في الجمبري ، ولا حتى في الإسكندرية كلها
